Mendebaldeko Erromatar Inperioaren gainbeheraren ondoren (476), Euskal Herriko bizimodua nekazaritza munduan murgildu zen zeharo. Euskal Herriko biztanle gehien-gehienak zuzenean lurretik bizitzen hasi ziren, autarkia ekonomikoko erregimenaren baitan.

XI. mendetik aurrera hiriak sortzen hasi ziren, eta XII. eta XIII. mendeetan sortutako hiribilduetan merkatari eta artisauak finkatu ziren. Halere, nekazaritzari lotutako munduak jaun eta jabe izaten jarraitu zuen, hiribilduetan biztanle guztien %20 bakarrik bizi baitziren.